Valse elemente in die kerk, en die effek daarvan

Ons wil liewer glo dat almal in die Christelike kerk opreg is en gelowig, maar die waarheid is dat dit nie so is nie - somtyds sluip "valse broeders" (2 Kor. 11:26; Gal. 2:4) in die kerk in om die skape te mislei (en word deur die bose daar geplant), en hulle spreek valse dinge... (Spr. 2:12). Hierdie is niks nuuts nie en was nog altyd 'n probleem in die midde van gelowiges. Maar watter effek het hierdie valses op die kerk?, en maak dit regtig saak of daar valse leerstellings in die omtrek is?

------------------------------------------------------------------------------------------------------------------------------

In Matt. 7:15 vgl. Jesus valse profete met WOLWE (Matt. 7:15 - "Maar pas op vir die valse profete wat in skaapsklere na julle kom en van binne roofsugtige wolwe is"). Ten eerste het Hy geleer dat ons moet PAS OP vir hierdie mense! Hoekom moet ons versigtig wees vir hulle? - duidelik het hulle 'n verkeerde invloed op die kerk...  Hierdie "wolwe" verwys beslis nie na mense wat onkundige gelowiges is nie, maar eerder na die wat voorgee dat hulle van die Here hoor maar na regte nie werklik van Hom hoor nie;  of voorgee dat hulle die waarheid verkondig maar na regte verkondig hulle menslike gebooie of hulle eie opgemaakte geloof. Dit is dan hoe die hart van 'n valse profeet of valse leraar lyk - hy gee voor om iets te wees wat hy nie is nie  (gee bv. voor hy is 'n profeet of leraar wat die Here se woord bring, maar bring sy eie woorde of verdraaide of valse leringe - hy pleeg bedrog). Of ons dit wil glo of nie, maar hierdie mense in die kerk het beslis 'n invloed op die huidige afvalligheid! 

Diesulkes gee voor hulle is broeders/susters wat saam met ons die Here dien, maar dien eintlik hulleself of iemand anders. Die wat vals is kan leed doen aan die kerk, bv.:

-om die skape uitmekaar te jaag (bring skeuringe in die kerk)(Joh. 10:12); of

-om mense te "vang" (Joh. 10:12)(om agter hulle aan te gaan, bv. om hulle valse en verdraaide leerstellings te glo). 

Valse profete gee voor dat hulle die Here dien maar doen nie, en betrek o.a. mense op hierdie manier om die Here op hulle manier te probeer dien... (deur bv. dooie werke). In Eseg. 22:27 word die vorste in Israel vgl. met "wolwe wat prooi verskeur" -  hulle het bv. o.a. bloed vergiet sodat hulle onregverdige wins kon maak... "Onregverdige wins" verwys tipies na wanneer iemand wins maak deur die reg te verdraai (bv. om omkoopgeskenke aan te neem - 1 Sam. 8:3; Jer. 22:17; Eseg. 22:13);  m.a.w. hulle pleeg bedrog met die doel om wins te maak (is dan "onregverdige wins"-Jer. 6:13). Valse profete/valse leraars pleeg bedrog! (tot hulle eie voordeel). Daar is mense in die kerk wat so opereer, en Paulus het graag na hierdie valses verwys en gewaarsku, bv. waar hy in Tit. 1:10-14 verwys na diesulkes as tugteloos en wat onsin praat en verleiers is, en leer wat nie betaam nie ter wille van vuil wins! Hy het hulle leringe o.a. "Joodse fabels" genoem, en "gebooie van mense" (menslike wette en leringe wat vd waarheid afwyk) - hulle gee dus voor hulle preek die waarheid, maar hulle doen nie, en hulle doen dit ter wille van wat hulle daaruit kan kry (hetsy eer of geld, ens.).

------------------------------------------------------------------------------------------------------------------------------

Ons moet natuurlik versigtig wees om iemand vinnig te oordeel (as bv. 'n valse profeet, want sommige is bloot onkudig), maar versigtigheid werk ook na die ander kant toe... - as iemand bv. gekenmerk kan word as vals, moet die waarheid gespreek word sodat dit kan wys hy's vals.  Kyk bv. Jesus se woorde in Matt. 10:16 - " Kyk, Ek stuur julle soos skape onder die WOLWE in; wees dan versigtig soos die slange en opreg soos die duiwe".  Let wel dat hierdie "uitstuur onder wolwe" nie verwys het na uitstuur onder ongelowiges nie, maar uitstuur onder mense wat bely hulle is gelowig (in hierdie geval was dit "skape van Israel", waarvan sommige nie werklik skape was nie maar "wolwe"). Die dissipels was uitgestuur om die waarheid te bring aan beide opregtes en valses (nie net aan die skape nie, maar ook aan die wolwe...). Die manier dus om so 'n situasie te hanteer is nie om stil te bly oor die waarheid (soos sommige kerke doen) nie, maar eerder om die waarheid te preek (en dan sal die wolwe hulle klere wys). Wolwe "verskeur" (Eseg. 22:27) en vang en jaag skape uitmekaar (Joh. 10:12), en terwille van onregverdige wins sal sommige selfs bloed vergiet (Eseg. 22:27)(is roofsugtig-Matt. 7:15) - hierdie is baiemaal 'n kenmerk van verleiers - hulle haat die opregte... -1Jn 3:15. Wanneer wolwe in 'n kerk inkom en sekere broeders "vang" (beweeg om agter hulle aan te gaan) en die ander "uitmekaarjaag" (skeuringe bring), saai dit verwoesting in 'n kerk. Voor Paulus se vertrek in Hand. 20 het hy o.a. die Efese ouderlinge gewaarsku teen WOLWE wat sal inkom in hulle gemeente... (Hand. 20:29-31), en hy't die volgende stellings gemaak rakende wolwe:  (1)  Hulle sal die kudde nie spaar nie;  (2)  Hulle sal verkeerde dinge praat om die dissipels weg te trek agter hulle aan...  Hierdie is die doel van "ingesluiptes".

Dit is maklik om te sien wie is wolwe en wie skape... - wolwe ontvang nie die waarheid nie! (Luk. 10), maar is liewer die wat opstaan teen die waarheid en ander beweeg om nie die waarheid (wat deur die opregte gepreek word) te ontvang nie.  Hierdie is terloops 'n goeie manier om "valse broeders" uit te ken... - is om die waarheid te spreek!  'n Valse profeet of valse leraar sal bv. bely dat hy in Jesus glo en in die waarheid, maar is nie gehoorsaam aan Jesus nie en glo nie in Sy woorde nie, maar glo liewer in "wat hy wil of wie hy wil" - hulle gee dus voor dat hulle die waarheid liefhet maar hulle vrug getuig anders sodra hulle met die waarheid gekonfronteer word. Hierdie verleiers gebruik o.a die metode van spot (is spotters vd waarheid) om mense te druk om liewer in hulle te glo as in die waaheid.

--------------------------------------------------------------------------------------------------------------------------
GEDAGTE:

Daar is Christene wat vandag glo dat daar nie iets bestaan soos "valse broeders" nie - hierdie is 'n groot miskonsepsie van ons tyd en baiemaal die rede waarom suurdeeg in die kerk insluip... Of hulle dink dat valse leerstellings nie regtig 'n probleem is, maar dit is net waar in geval van waar mense die waarheid ken en volg.  Die waarheid is dat in sommige kerke word valse leringe liewer gekoester in plaas van aangespreek!, en die wat die waarheid ken, bly stil daaroor (?). Ons moet verstaan dat "ingesluiptes" deur die bose in die kerk gesaai word, en Jesus het o.a. geleer dat dit gebeur wanneer die kerk slaap! (Matt. 13:25)(bestudeer gerus die tema van "slaap" en wat dit nou juis beteken). Ingesluiptes (Jud. 1:4) is ongelowig en vals (gee voor hulle is gelowig maar is nie, en is deur die bose daar gesaai). Hulle is gewoonlik verleiers, en word o.a. in Jud. 1 "skandvlekke" genoem (soos besoedeldes)(Jud. 1:12), en "struikelblokke" (omdat hulle mense vang om ongehoorsaam te wees aan die Here en Sy waarheid). Hulle word ook "dwaalsterre" genoem (want hulle dwaal!)(Jud. 1:14), en "goddelose mense" (want hulle doen nie die wil van die Here nie, maar hulle eie wil)(Jud. 1:6,7,11,18). Hulle is ook baiemaal spotters (want hulle spot met die waarheid, en maak die opregte op daardie manier stil)(Jud. 1:18; 2 Pet. 3:3-5).

Die begrip "valse broeders" behels nie net 'n broeder wat voorgee dat hy 'n broeder is nie, maar sluit ook in enige iemand in die Christelike kerk wat "vals" is bv. valse profete en valse leraars (maar as broeders gesien word)(Gal. 2:4).  Die begrip wat veral gebruik word vir valse profete/valse leraars is "wolwe". Jesus het ook die begrip "onkruid" gebruik in Matt. 13:26,30,38, waar onkruid voorgestel word as "kinders vd bose". Onkruid lyk soos koring, maar is nie koring nie.... Hierdie mense (wat onkruid is) gee dus voor hulle is broeders, maar is nie werklik nie - hulle groei saam met die koring en lyk soos koring, maar met die tyd sal hulle vrug wys dat hulle nie regtig koring is nie.  Hierdie opmerking word terloops ook van valse profete gemaak..., bv. "aan hulle vrug sal hulle geken word"! (Luk. 6:43,44). Valse profete kan voorgestel word met wolwe omdat 'n wolf se doel is om skape te vang en uitmekaar te jaag (Joh. 10:12).  Valse profete en valse leraars kan gevaarlik wees vir die ware Christen (2 Kor. 11:26), omdat hulle kan twyfel saai en mense wat swak of jonk is in die geloof kan beweeg om "te doen wat hulle wil", nie wat die Here wil nie. 

Hoekom sal iemand voorgee dat hy die waarheid verkondig maar hy doen nie? 

Hoekom sal hy voorgee dat hy deel is van die kinders vd koninkryk, maar hy is nie? Duidelik het die bose 'n plan om verwoesting in daardie kerk te saai en die kinders van die Here te mislei...  Ingesluiptes wil nie dien nie, maar wil gedien word! (Gal. 2:4);  en hulle maak skape seer in hulle poging tot selfverheffing (sien die onderwerp van "onregverdige wins" vorige paragraaf - Eseg. 22:27)... Hulle praat verkeerde dinge met die doel om disspels vd Here weg en agter hulle aan te trek (Hand. 20:29,30).  Diesulkes moet beslis aangespreek word (3 Joh. 1:9,10), of die skape moet gewaarsku word sodat die suurdeeg nie die hele deeg suurmaak nie.  Daarom is ware lering in die kerk baie belangrik sodat ware kinders kan onderskei en nie "weggesleep" word nie. 

-----------------------------------------------------------------------------------------------------------------------------

Goeies én slegtes in die koninkryk

Nie almal wat hulleself Christene noem of aan die Christelike kerk behoort, is "goeie saad" nie. Alhoewel "kinders vd koninkryk" gesien word as die wat deel is van God se koninkryk en Hom dien, is die waarheid dat nie almal in hierdie koninkryk opreg is nie. Net soos in ander koninkryke op aarde is daar ook struikelblokke in die "konkryk van God". Hierdie "struikelblokke" gee voor dat hulle die Here dien maar dien eintlik die ongeregtigheid. Hulle is soos spioene wat voorgee dat hulle deel is vd volk en die land se belange op die hart dra, maar hulle is eintlik daar met 'n bose plan.  Diesulkes kan bv. 'n struikelblok wees vir ander Christene omdat hulle hul probeer verlei, of wereldse leringe en afgodspraktyke in die kerk invoer... - Openb. 2:14; 1 Kor. 8:9; Rom. 14:13-15; Matt. 18:6,7. 

-----------------------------------------------------------------------------------------------------------------------------

In Matt. 13:37-42 het Jesus geleer dat daar mense is onder die kinders vd koninkryk wat saam met die volk groei, maar nie werklik deur die Here gesaai is onder die volk nie (maar deur die bose daar gesaai - Matt. 13:25). Ons moet onthou dat gelowiges in sommige skrifte voorgestel word soos saad wat in die wereld gesaai word om te groei en vrug te dra, maar alhoewel daar faktore is wat vrug beinvloed, bepaal die soort saad wat se soort boom opkom.  In ander woorde, nie almal wat in die Christelike kerk gesaai is, is deur die Here gesaai nie!, en groei in bome wat ewige vrug dra nie. Sommige is deur die vyand daar onder die kinders vd Here gesaai. Hierdie mense word in Matt. 13 vgl. met "onkruid" - hulle lyk ma.w. soos koring  maar is nie koring nie!  - hulle lyk soos kinders vd koninkryk maar is eintlik kinders vd bose - hulle gee voor hulle is Christene, maar is nie!  Alhoewel nie altyd onmiddellik sigbaar nie, sal diesulkes uiteindelik aan hulle vrug geken word...  In die koninkryk van God, of anders gestel, onder die mense wat aan hierdie koninkryk behoort en gesien word as kinders vd koninkryk, is daar dus mense wat die ongeregtigheid doen (Matt. 13:41) en nie eendag sal ingaan in die ewige koninkryk nie (Matt. 13:30, 40-42). Jesus  het o.a. ook die koninkryk vd hemele vgl. met 'n NET WAT IN DIE SEE GEGOOI WORD, en let op die woorde daar:  "en van elke soort bymekaarbring" (Matt. 13:47). Hy het ook verder verduidelik hoe, met die voleinding vd wêreld die engele sal uitgaan en die slegtes onder die regverdiges uit afskei (en die slegtes in die vuuroond gooi)(Matt. 48-50).  Die waarheid is dus dat daar in die Christelike kerk "visse" is wat voorkom asof hulle goeie saad is en deur die Here gesaai is, maar wat eintlik deur die bose daar gesaai is (om struikelblokke te wees in die kerk).  

M.a.w., nie almal in die Christelike kerk is gewederbaar nie (en nie almal is heilig en goed en gelowig nie).  En nie almal wat deurgaan vir Christene het die Heilige Gees nie! 
------------------------------------------------------------------------------------------------------------

GEDAGTE:

In die EVANGELIE wat Christus gebring het oor die Koninkryk het Hy dus 'n duidelike onderskeid gemaak tussen die goeies en slegtes (l.w., "in die koninkryk"!).  Alhoewel Christus vele beloftes het vir Sy SKAPE en vir die wat as KORING gesien word, moet ons nie dink dat hierdie beloftes ook bedoel is vir die akteurs wat hulleself voordoen as skape maar eintlik wolwe is, of die onkruid wat tussen die koring groei nie;  of bedoel is vir die wat op die ou end bokke uitdraai of onbruikbare kaf word nie... (1 Tim. 5:12; Matt. 25:32). Dus, nie almal wat behoort aan 'n Christelike kerk sal eendag in die koninkryk ingaan en die ewige lewe beerwe nie. Nie almal wat bely hulle is Christene (geroepenes) sal inderdaad eendag erf of opstaan tot lewe nie, want die realiteit is dat sommige sal opstaan tot veroordeling  (Joh. 5:28,29). Nie net die valses nie, maar ook die wat nie vashou nie, bv. die wat nie in Jesus Christus BLY nie, staan die gevaar dat hulle onvrugbaar sal wees wanneer Hy terugkom - en wat sal dan tog gebeur wanneer Jesus kom om hulle vrug te oes? (Jak. 5; Rom. 2:1-10). 

Die Christelike kerk is nie gevrywaar van valse gelowiges nie.  Hierdie valse broeders (2 Kor. 11:26; Gal. 2:4) word o.a. voorgestel as "wolwe" waarvan vasle profete deel uitmaak van hierdie groep (Matt. 7:15) - hulle gee voor dat hulle 'n woord van die Here bring maar praat eintlik uit hulleself; of bring 'n woord vd bose. Daar is 'n manier om valse profete uit te ken en dit is gewoonlik aan hulle vrug. Bv., 1 Joh. 4 leer vir ons dat valse profete nie gehoorsaam is aan die waarheid nie.  Hulle kom in opstand teen die waarheid asook in opstand teen die wat die waarheid verkondig, en hulle praat en dink dus anders as die wat die Gees vd waarheid het (1Jn 4:5 - "Hulle is uit die wêreld; daarom praat hulle uit die wêreld, en die wêreld luister na hulle"). Valse profete het nie die Heilige Gees nie en sal dus verkeerd praat en ook in opstand kom teen die wat reg praat. Hierdie is een vd maklikste maniere om te bepaal of iemand waar of vals is... (aan hulle vrug sal hulle geken word). Bv., as iemand bely dat hy in Jesus Christus glo maar hy glo nie in Sy woorde nie, dan is daar beslis 'n vraagteken op daardie persoon se geloof. 

'n Ander groep wat miskien ook onder "wolwe" gesorteer kan word is valse leraars (wat verderflike ketterye heimlik invoer onder die kinders vd Here); alhoewel valse leraars nie altyd verwys na wolwe nie. Valse leraars kan ook verwys na gelowiges wat eens wel die waarheid gevolg het maar afvallig geword het en nou die Here verloën (2 Pet. 2:1)(kan dus vgl. word met mense wat ongehoorsaam is aan die waarheid (Rom. 2:8,9), of vgl. word met die tema hart verhard). Ons sien somtyds hierdie in die kerk gebeur, waar iemand die Here begin volg en begin vrug dra, maar sy vrug verloor omdat hy ophou om die Here te dien en glo  - so iemand verloën die geloof (kyk vb. 3de groep in die gelykenis vd saaier - Matt. 13:22 / is baiemaal die wat mislei is). En omdat hulle self nou die leuen glo, verkondig hulle leuens (hulle bedrieg hulleself). "Slegtes" in die koninkryk verwys dus nie net na ongelowiges wat deur die bose gesaai is onder die kinders vd Here nie, maar kan ook verwys na gelowiges wat "sleg" is; m.a.w., mense wat wel deur die Here gesaai is maar nie aan Hom vashou en in Hom bly nie - nie omdat Hy laat los nie, maar omdat hulle laat los!  Bv., "bokke" dra nie die vrug van 'n skaap nie, en verwys na die wat in opstand kom  teen die Here se gesag - hulle verwys na hardkoppige, ongehoorsame en/of onbarmhartige gelowiges (Matt. 25). Hierdie groep gelowiges sal soos die valses ook nie eendag die koninkryk beerwe nie (Matt. 25). "Kaf", soos bo gesien, is ook 'n term wat gebruik word vir sekere gelowiges maar verwys na 'n spesifieke groep gelowiges, nl. die wat nie vrug dra of die nodige vrug dra nie (hulle is dus waarlik Christene, maar dra nie die nodige vrug nie, of het onvrugbaar geword)(gelykenis vd saaier).  Anders as koring (wat vrug dra) verwys kaf na die nutteloses en selfsugtes. Net soos kaf die deel is van koring wat onbruikbaar is en weggegooi word, net so sal gelowiges wat onvrugbaar is gesien word as onbruikbaar en "weggegooi en in die vuur gegooi" word wanneer Jesus terugkom (Matt. 3:12,17). 

Wolwe" is roofsugtig van aard - hulle doel is om die skape uitmekaar te jaag en te verskeur (Matt. 7:15; Hand. 20:29; Joh. 10:12) deur bv. verkeerde dinge te praat om kinders vd Here te mislei en weg te trek agter hulle aan (Hand. 20:30; Matt. 24:11).  Hierdie mense word deur die bose onder die kinders vd Here gesaai - hulle gaan saam met ons kerk toe en lyk of hulle deel is vd broeders en susters (Hand. 20:30; Matt. 7:15) en kom somtyds selfs kragtig voor! (Matt. 24:24), maar die waarheid is dat hulle 'n bose doel het. Daar mag dalk in jou kerk sit "wolwe in skaapsklere" - mense wat skape "vang" en "uitmekaarjaag". Dit is waar dat nie almal in die Christelike kerk "goeies" is nie, en nie almal in "die koninkryk" sal eendag erf nie;  en wanneer Jesus terugkom sal die goeies van die slegtes geskei word.  Matt. 13 leer vir ons dat die "toestand" van beide goeies en slegtes in die huidige (geestelike) koninkryk nie sal verander voor die voleinding vd wêreld nie (1 Kor. 4:5; Hebr. 10:30). Dit is m.a.w. eers wanneer Jesus terugkom wat die goeies vd slegtes geskei sal word. Wat elke KIND VD KONINKRYK moet doen oor hierdie toestand is nie om die "slegtes" self te probeer skei en verwyder uit die koninkryk nie (alhoewel jy ander kan waarsku teen hulle - Matt. 16:6), maar om elke gees te beoordeel en versigtig te wees met wie jy uithang en saam wie jy stem. Daar is 'n rede waarom Jesus nie met almal uitgehang het nie. Ware Christene behoort ook hulle situasie te kan beoordeel en moet versigtig wees met wie hulle omgaan en saam met wie hulle eet. Skape vd Here moet doen wat Jesus gesê het, nl. "versigtig wees soos die slange, en opreg soos duiwe" (Mat 10:16) - pasop vir (sekere) mense wat daarop uit is om jou te verwoes! (Matt. 10:17)(maar moet jou nie kwel oor wat jy moet spreek nie, want die Gees sal vir jou die woorde gee... Matt. 10:19,20). Moet hulle nie vrees nie, want daar is niks bedek of verborge wat nie ontdek en bekend sal word nie (Matt. 10:26,28). 

Elke gelowige moet ook selfondersoek doen, want ons het gesien dat daar ook "slegte" gelowiges is in die koningkryk van God wat nie vashou nie. Elkeen moet bepaal watter stof hulle beskryf - is jy koring?, is jy kaf?, is jy 'n bok?, is jy 'n afvallige?, is jy "siek"?;  want wanneer Jesus terugkom sal sommige vd wat nou GEROEP word (DIE GENOOIDES-Openb. 19:9) in die huidige "geestelike" koninkryk, nie in die "fisiese" koninkryk van God ingaan nie (a.g.v. ONGEHOORSAAMHEID en ONGELOOF).   As jy die Here bely voor mense, sal Hy jou ook bely voor Sy Vader (Matt. 10:32) - staan dus op vir die waarheid en vir Jesus en Sy woorde!;  maar as jy Hom verloën voor mense, dan sal Hy jou ook verloën... (Matt. 10:33). 

-----------------------------------------------------------------------------------------------------------------------------