Onreines gaan nie erf nie, maar wie word gesien as onrein?

Kan onreinheid 'n wedergeborene se saligheid beïnvloed?  

Kan 'n weergeborene wie se hart gesuiwer en liggaam gereinig is, weer onrein word? 

------------------------------------------------------------------------------------------------------------------------------

Die Skrif leer dat geen ONREINE 'n erfdeel het in die koninkryk van God nie (Ef. 5:5). "Reinheid" of "onreinheid" is 'n beskrywing wat meer spesifiek gebruik word vir die toestand van iemand se hart (Matt. 15:18; Mark. 7:23), en het baie te doen met die GEWETE (Rom. 14:14). "Wat iemand eet" kan bv. nie vir hom onrein maak nie, maar sou dit wat jy eet iets soos afgodsoffers wees (en jy kennis het hiervan), dan mag dit inderdaad vir jou onrein wees! - nie in die sin van dat die kos jou onrein kan maak nie maar het te doen met die gewete. Gelowiges wat bv. in dieselfde juk trek met ongelowiges, met hulle tempels, afgode, afgodspraktyke ens., kan onrein word hierdeur (2 Kor. 6:14-18). Wedergeborenes word wel gesien as REIN (skoon en geheilig) omdat hulle harte gesuiwer is van 'n slegte gewete en die liggaam gereinig met "rein water" (Hebr. 10:22), ja, maar dit beteken nie dat hulle glad nie meer onrein kan word nie... Daarom word Christene beveel om nie "aan te raak wat onrein is nie" (2 Kor. 6:17), en die wat onrein geword het beveel om "die harte te suiwer en die hande te reinig" ( Jak. 4:8). 

"Koring" se identiteit word nie net beskryf deur die soort "saad" nie maar ook deur die vrug wat dit uiteindelik dra - al is iemand ook uit die saad van God gebore (en is skoon/rein), is dit sy vrug wat uiteindelik sal getuig of hy inderdaad (soos) 'n kind van God is, en of hy REIN is of nie.  Bv., nie almal wat "kinders van Abraham" is (dus uit sy saad gebore) is inderdaad "sy kinders" nie! (Joh. 8:39), want elkeen se werke gaan wys of hy inderdaad 'n kind van Abraham is of nie. Met 'n bietjie "reën" is saad veronderstel om nuttige plante voort te bring, maar as dit bv. dorings en distels oplewer is dit 'n getuienis van daardie persoon se ware toestand vd hart (Hebr. 6:6-8).  Op dieselfde wyse kan vrug getuig wat se soort boom dit is, ja (bv. 'n wedergeborene, gebore uit die saad van God), maar vrug is ook uiteindelik 'n beeld van daardie boom se gesondheidstoestand (bv. of iemand "onder dorings gesaai" het ens.) - die vrug vd gelowige wys wat is die toestand vd gelowige se liggaam en gewete (is hy rein, of is hy onrein?). 'n "Boom" wat siek is, bv. 'n gelowige wat stap in sonde of stap in sonde tot die dood, se "liggaam" is siek en hy staan die gevaar om dood te gaan sou hy hom nie vd sonde bekeer nie. "Vrug" is weer meer beeldspraak wat gebruik word vir die toestand vd hart. Slegte vrug is bv gewoonlik 'n aanduiding van valsheid of dat iemand 'n misleier is (is 'n "slegte boom", en dra daarom slegte vrugte/dorings/distels)(Matt. 7:15-20), terwyl "geen vrug" (Joh. 15:2,4) na twee dinge kan verwys - (1) die persoon het nie wortel nie en glo net vir 'n tyd en val af in tyd van versoeking (Matt. 13:5,6)(saai op rots);  of (2) die persoon dra wel vrug maar verloor dit agv sorge, rykdom, genietinge ens. (Luk. 8:14; Matt. 13:7)(saai tussen die dorings, en die dorings verstik die vrug) - (bestudeer gerus die gelykenis vd saaier om hierdie beter te verstaan). 

------------------------------------------------------------------------------------------------------------------------------

Wedergeborenes wat onrein word maar niks doen om weer rein te word nie, sal uiteindelik gekenmerk word as "onreines" (nie as reines nie!). Wat dit aanbetref word daar 'n vb. gemaak van sekere groepe in die Skrif, bv. hoereerders, gierigaards, afgodedienaars ens. (1 Kor. 6:10)(bv. hierdie is sondes spesifiek teen die eie "liggaam" - kan liggaam onrein maak, 1 Kor. 6:18) - hierdie mense verwys na kinders vd koninkryk wat stap in sonde tot die dood... (maw hulle sonde is "tot die dood" omdat hulle hul nie daarvan bekeer nie). Hierdie is terloops ook tipies sondes wat bloedskuld veroorsaak! en wat in die O.T. slegs betaal kon word deur iemand se bloed (en daarom o.a. was die met bloedskuld in die O.T. vervloek/doodgemaak).  Alhoewel Christus in ons plek gesterwe het (en so vir alle sondes betaal het, ook vir dit wat bloedskuld veroorsaak), is dit gevaarlik wanneer iemand terugval en bly stap in hierdie weë, want hoe sal so iemand se bloedskuld dan betaal word? Wat sal gebeur as hy in hierdie toestand sterwe? (onrein liggaam) - watter offer het hy dan?;  sal hy die Here oor en oor kruisig? (Hebr. 6:6; Hebr. 10:29). ONREINHEID onder Christene is nie iets wat ligtelik opgeneem moet word nie. 

Ons moet altyd onderskei tussen wat is REIN en wat is ONREIN (en tussen wat is HEILIG en wat is ONHEILIG) (Lev. 10:10) - ...natuurlik ook in die N.T. !  In die N.Testamentiese tyd is alles nie rein verklaar soos baie glo nie nie;  alhoewel, in die regte konteks kan dit wees... Bv., as die Here iets rein verklaar wat onrein was in die O.T., dan is dit rein vir die Christen al was dit ook vroeër gesien as iets wat iemand onrein kon maak. Wette rondom wat is rein en wat is onrein het nie veel verander nie, alhoewel die manier hoe dit vervul word in baie opsigte verander het vanaf die ou na die nuwe testament. M.a.w., dit wat as onrein gesien is in die Ou Testament, bv. dit onder die wet van Moses, word steeds as onrein gesien; tensy die Here dit rein verklaar het!, of die manier hoe iemand weer rein word anders vervul word in die N.T. as in die Oue... Die volk van God is 'n HEILIGE VOLK omdat hulle skoongewas is en afgesonder is vir die Here, maar as hulle hul VERONTREINIG (maw hulleself besoedel), dan is hulle besig om hulleself te ONTHEILIG (besig om hulleself af te sny vd "afsondering").
------------------------------------------------------------------------------------------------------------------------------
In die Ou Testament, onder die wet van Moses, mag niks wat onrein is aangeraak word nie;  geen onrein mens, dier of enige verfoeisel nie (Lev. 7:21), want dan sou jyself ook onrein word... (dit is bv. ook agv hierdie rede waarom die Hebreeuse volk geensins met die heidene omgegaan het nie - hulle is gesien as "onrein" en omgang met hulle kon hulle onrein maak...- Hand. 10:28).  As iemand homself verontreinig het deur 'n onrein dier, dan het hy homself BESOEDEL.  Om sy vlees weer te reinig was verskillende prosedures gevolg in verskillende gevalle, of andersins was iemand onrein vir 'n spesifieke tydperk (Lev. 11:24,25). In sommige gevalle moes daar aan die einde vd onrein typerk spesifieke prosedures gevolg word om weer rein te word (soos in die geval van die vrou wat swanger word en 'n kind baar - Lev. 12). MAAR ons moet verstaan dat "onrein" nie altyd 'n toestand is wat verwys na "onrein a.g.v. sonde" nie. Somtyds beskryf die woorde rein en onrein slegs 'n toestand bv., "onrein" kan ook verwys na iemand met 'n siekte... (Mark. 1:40), maar nie dan noodwendig bedoel siek of onrein a.g.v. sonde nie (Joh. 9:2,3)(alhoewel in sommige gevalle siekte wel die gevolg kan wees van sonde);  daarom moet ons verstaan dat in die geval van siektes "onreinheid" ook slegs 'n toestand beskryf en die persoon is weer "rein" wanneer hy genees is. Waar iemand egter siek is a.g.v. sonde kan hy nie "rein" word of genees nie alvorens hy hom van sy sonde bekeer of vergifnis vra nie!

Ons moet dus onderskei tussen onreinheid a.g.v. sonde en onreinheid wat slegs 'n toestand beskryf. 'n Goeie vb. hiervan is in die konteks van die wat maagdelik rein is of nie;  en dit verwys spesifiek na die wat getroud is en die wat nie getroud is nie. 'n Getroude man word bv. as maagdelik "BESOEDELD" gesien, maar die een wat nie trou nie en nie 'n vrou behaag nie (en dus nie omgang het met 'n vrou nie), word as maagdelik REIN gesien (Openb. 14:4)(NIE bedoel "rein van sonde" nie, maar "maagdelik rein"). En natuurlik beteken dit dan nou nie dat die (Christelike) man wat trou sondig omdat hy homself "besoedel" nie (1 Kor. 7:28), maar waarna dit verwys is dat hy nou nie alleenlik besorg is oor die Here nie maar ook besorg is oor die dinge van die wêreld, bv. hoe hy die vrou sal behaag... (1 Kor. 7:33)- hy is maw besoedel op 'n natuurlike manier, maar 'n man wat ebreuk pleeg word besoedel op 'n geestelike manier.  Ongetroudes ("Christelike maagde") is slegs besorg oor die dinge van die Here EN HOE HULLE DIE HERE SAL BEHAAG (1Kor. 7:32) - in daardie opsig is hulle "rein" op 'n natuurlike manier (nie maagdelik besoedel nie). Dus is die huwelik HEILIG (afgesonder) vir die twee wat getroud is omdat hulle behae het na mekaar (en in daardie opsig REIN / skoon vir mekaar...). Hierdie feit word ook as beeldspraak gebruik in Jes. 62:4 van hoe die land Israel GETROUD sal wees aan die Here.  Let op die woorde in Jes. 62:4: -"want die Here het ‘n behae in jou, en jou land sal getroud wees".  (Sien hoe die land Israel geheilig is vir die toekomstige eeu, asook die stad Jerusalem; en die stad terloops geheilig tot in ewigheid...).  Hier sien ons dus dat die man wat trou en homself "besoedel" met die vrou, nie onrein is omdat hy sondig nie maar die onreinheid hier slegs sy maagdelike toestand beskryf - m.a.w. dit beskryf sy behae in sy vrou en die huwelik waarin hulle geheilig (afgesonder is) vir mekaar - hulle huwelik kan m.a.w. gesien word as REIN (maar vir mekaar).

Maar in die geval van ebreuk beskryf die woord ONREIN eerder die toestand van die hart - word onrein deur sonde ("onrein op 'n geestelike manier").  Die persoon wat onrein is a.g.v. sonde, het REINIGING nodig;  maar iemand wat maagdelik onrein is a.g.v. die feit dat hy getroud is het bv. nie reininging nodig nie..., want na regte is hy rein (in die huwelik). 

------------------------------------------------------------------------------------------------------------------------------
Om die tema van onreinheid beter te verstaan, kan ons dus ook onderskei tussen "onrein op 'n geestelike manier" en "onrein op 'n natuurlike manier".  'n Vrou is bv. "onrein" wanneer sy menstrueer, maar bv. nie op dieselfde manier "onrein"/vuil as wanneer iemand onrein is a.g.v. sonde nie. 'n Goeie vb is die van "bevlekte hande" - bevlekte hande verwys nie noodwendig daarna dat die hande vuil is a.g.v. bloed in die sin van "bloed op hande"/'n moordenaar (Jes. 59:3)(is m.a.w. onrein op geestelike manier ) nie, maar hulle kan bevlek of vuil wees op 'n natuurlike manier (bv. bloed, grond, ink,  watookal). Die manier hoe reiniging verkry word in elke geval, verskil.  Hande wat bevlek is op 'n natuurlike manier moet bloot gewas word, maar hande wat "met bloed bevlek is" op 'n geestelike manier, kan nie op dieselfde manier reiniging verkry nie. 'n Moordenaar se "hande" word nie skoon (hy word nie rein) bloot deur sy hande in water te was nie - reiniging vind nie op enige manier plaas nie, want dit hang af van wat se soort onreinheid ons praat... 

Christene wat onrein word het reiniging nodig, en die situasie bepaal die metode van reiniging. Daar is baie dinge waardeur die mens onrein kan word, o.a. word sommige BESOEDEL met een of ander gees ("bose of onreine geeste") - so iemand word dan ook as 'n "onreine" gesien. Omdat weergeborenes die Heilige Gees het glo meeste geleerdes dat dit nie moontlik is vir 'n weergeborene om 'n bose gees te ontang nie, maar wat gebeur as 'n weergeborene begin speel in afgodspraktyke en praktyke begin volg waarin so iemand hom/haarself oopstel vir kommunikasie en ontvang van bose en onreine geeste? (bv. sekere vlakke van oosterse meditasie, joga ens.). In so 'n geval is so 'n weergeborene besig om sy geloof in 'n ander geloof (- of ander geloofspraktyke) te plaas en die bose te raadpleeg - hy is besig om "geestelik te hoereer" en die Skrif leer vir ons dat hierdie beslis iets is waardeur kinders vd koninkryk BESOEDEL kan word... (gewete word besoedel). Weergeborenes wat afvallig word vd geloof en die Heilige Gees bedroef (Ef. 6:30), kan nie verwag om rein te bly nie. En terloops, wat gebeur as iemand die Heilige Gees bedroef?  Kan die Gees weggeneem word van so iemand?

\-------------------------------------------------------------------------------------------------------------------------

GEDAGTE:

Watookal iemand se onreinheid (op 'n geestelike manier), elkeen wat onrein is het nodig om rein te word, want niks wat "verontreinig" is sal eendag in die nuwe hemel en aarde in die nuwe stad Jerusalem toegelaat word nie (Openb. 21:27). Christene moet verstaan dat net soos dit belangrik was om rein te word in die Ou Testament, net so is reiniging nodig in die Nuwe. Ons word nie een maal skoongemaak en laat staan asof ons nou kan onrein word soos ons wil en word onvoorwaardelik vergewe (soos baie deesdae glo) nie, maar het steeds nodig om skoongemaak te word sou ons weer besoedel word... Die feit dat Jesus se offer eenmalig was en nie oor en oor gebring hoef te word nie, beteken nie dat 'n wedergeborene wat besoedel is nie nodig het om rein te word nie! Om in 'n toestand van onreinheid te bly is gevaarlik vir die weergeborene, en as hy nie sy sonde bely en dit neerlê nie, kan dit wel verander in "sonde tot die dood" (sonde wat tot die dood lei...).
--------------------------------------------------------------------------------------------------------------------------

Die eet van rein en onrein diere

In die O.T. sou die wat onrein diere eet, hulleself verontreinig (Lev. 11:43). Die vraag oor of dit toelaatbaar is vir die Christen om onrein diere te eet, is iets wat al baie redenasie uitgelok het onder geleerdes. Eerstens moet ons onderskei tussen WETTE wat deur die Here gegee word, en MENSLIKE GEBOOIE. Mensgemaakte wette moet nie gesien word soos wette v/d Here nie.  Paulus verwys na sulke leringe as 'n skyn van wysheid wat in "eiesinnige godsdiens en nederigheid en in gestrengheid teen die liggaam, GEEN WAARDE HET NIE" (Kol. 2:20-23). Daar is plekke waar menslike gebooie wel gehoorsaam moet word (soos in die geval van kinders teenoor ouers se wette), maar die konteks van Kol. 2:20-23 gaan oor waar mensgemaakte wette gesien word as nodig "tot aanneming tot kinders van God", - in so 'n geval moet dit gesien word as 'n skyn van wysheid wat geen waarde het nie. Bv., die skrifgeleerdes en Fariseers het verkeerdelik geglo dat hulle menslike gebod wat gaan oor "handewas voor ete" deur die Here verwag word, asof hulle nie aangeneem sal word as hulle nie die gebod nakom nie... (Matt. 15:2-9).
----------------------------------------------------------------------------------------------------------- "Wette van die Here" moet egter gehoorsaam word, maar dit is juis wat die onderwerp van die eet van rein en onrein diere so ingewikkeld maak...  (Lev. 11; 20:25...), maar wat ons moet onthou is dat wette (wat deur die Here gegee word oor wat rein en wat is onrein), gaan beslis oor wat Hy as rein of as onrein verklaar, en "wanneer".  En kan terloops anders vervul word in verskillende tydperke oor "tyd" afhangende van wat die Here wil en toelaat.  Om dit beter te verduidelik verwys sommige Christelike kerke hierna as "bedelings". Nie dat die Here se wette ooit tot niet gaan nie, maar dit word baiemaal anders vervul in verskillende tydperke. Bv., in die tydperk voor "Noag se ark" wil dit lyk of die mens nie toegelaat was om enige vleis te eet nie (Gen. 1:29,30);  tog, in die tydperk nadat die ark gestrand het, was hulle toegelaat om vleis te eet (Gen. 9:3) - maar l.w. Gen 9:4 - "Net die vleis met sy siel, met sy bloed, mag julle nie eet nie"(Lev. 7:26). Hierdie feit dat ons geen bloed mag eet nie, is ook iets wat in die N.T. beveel word (Hand. 15:20,29; 21:25) - in konteks gaan die eet van bloed egter nie oor die tema van "voedsel" nie, maar oor die feit dat die siel in die bloed is (Gen. 9:4-6).  Hulle is dus toegelaat om diere (wat ook 'n siel het) dood te maak sodat hulle die vleis kon eet, maar net nie met die siel nie! (Lev. 17:11,14). Christene wat bloed eet, word verseker onrein daardeur... nie omdat hulle nie "die wet" gehoorsaam nie, maar omdat hulle "sondig". Alhoewel die mens in Gen. 9 alreeds die kennis gehad het van wat is rein en wat is onrein diere, vind ons tog nie daar 'n rekord van waar hulle belet word om onrein diere te eet nie (alhoewel slegs rein diere geoffer was). Toe later, in die tydperk v/d volk in die woestyn en daarna, het daar heelwat ander koswette bygekom (Lev.), o.a. die feit dat geen onrein diere geeet mag word nie (Lev. 5:3; 11:24,43,44; Dan. 1:8...).  Daar was natuurlik ook baie MENSGEMAAKTE  WETTE onder die volk wat, alhoewel hulle geglo het dat daardie dinge hulle onrein maak, dit tog nie so was nie (soos die kwessie van handewas voor ete...). 
------------------------------------------------------------------------------------------------------------
Jesus het ook hierdie onderwerp aangehaal en geleer dat niks wat ingaan in die maag, iemand ONREIN kan maak nie, maar slegs dit wat in die hart is van die mens:  (Mar 7:18,19 - "En Hy sê vir hulle: Is julle ook so sonder verstand? Begryp julle nie dat alles wat van buite af in die mens ingaan, hom nie onrein kan maak nie,  omdat dit nie ingaan in sy hart nie, maar in die maag, en dit gaan in die heimlikheid uit en maak al die voedsel rein?
(Mar 7:20)  En Hy sê: Wat uit die mens uitgaan, dit maak die mens onrein.
(Mar 7:21)  Want van binne, uit die hart van die mense, kom die slegte gedagtes, egbreuk, hoerery, moord...  Alhoewel hierdie stelling gemaak is in konteks met "mensgemaakte gebooie" (onreinheid a.g.v. eet met ongewaste hande), is dit tog duidelik volgens die Here se verduideliking dat Hy ook verwys het na "voedsel" - Mark. 8:19; maw, dat geen voedsel "wat van buite af in die mens ingaan hom onrein kan maak nie, omdat dit nie ingaan in sy hart nie, maar in sy maag".... As iemand gedagtes van sonde koester, dan is dit dit wat in sy hart aangaan - m.a.w., ek moet ondersoek wat is die oorlegginge en gedagtes van my hart? (Hebr. 4:12,13).  Dit is hierdie gedagtes waardeur hy onrein (besoedel) kan word (Ef. 4:19-20). (Vgl. dit met Mat 5:28 - "Maar Ek sê vir julle dat elkeen wat na ‘n vrou kyk om haar te begeer, reeds in sy hart met haar egbreuk gepleeg het). 

En alhoewel die eet van bloed iets is wat ingaan in die maag, maak dit iemand nie onrein omdat dit "voedsel" is nie, maar omdat die persoon "die vleis eet met die siel".  Dieselfde met afgodsoffers:  dit is nie die voedsel wat die persoon onrein maak nie (1 Kor. 10:19), maar die feit dat hy deel in 'n offer wat gemaak is aan afgode (eintlik aan duiwels gemaak), en hy eet dit saam met die persoon wat dit offer asof hy ook waarde heg aan die afgod. In so 'n geval het hy saam met die persoon wat dit offer "gemeenskap met duiwels"! (1 Kor. 10:20). In die gevalle van "bloed eet" "of dit wat verwurg is", en "die eet van afgodsoffers" gaan dit dus nie oor voedsel nie, maar oor die GEWETE (1 Kor. 8:7) - vgl. (Lev. 17:14; Lev. 19:29; Jer. 3:9; 13:27 ) met (1 Kor. 10:18-20; Hand. 15:29; 21:25; Openb. 2:14,20)(Rom. 14:3,15,20; Hand. 21:25...).   ----------------------------------------------------------------------------------------------------------------------------------

GEDAGTE:


Wette wat deur die Here gegee word, is nie iets wat tot niet gaan nie, maar kan wel verskillend vervul word in verskillende tydperke afhangende van hoe die Here besluit.  Dit is nie ons wat besluit wat is rein, en wat nie. En wat die Here rein maak, mag ons nie onheilig ag nie (Hand. 10:15). Hierdie feit  is iets wat die Here vir Petrus gese het toe Hy vir hom in 'n verrukking van sinne 'n groot laken wys met die onrein diere en beveel om dit te slag en te eet, maar Petrus het geweier omdat dit onrein diere was. Alhoewel dit wat die Here vir hom hier wou leer meer gegaan het oor "hoe ons geen mens onheilig moet noem nie" (en moet asb. verstaan waarna dit verwys, want dit beteken nou nie dat almal heilig is nie!), is die slotsom nie uitgeskakel dat hierdie ook kan verwys na watter voedsels vir ons geheilig (afgesonder) is nie - nie dat dit sou beteken dat onrein diere nou rein is nie, maar eerder dat die eet van sulke vleis ons nie onrein kan maak nie. Dit is ook interessant om te sien dat die dissipels, gelei deur die Heilige Gees, in Hand. 15 (alhoewel die konteks gegaan het oor die besnydenis en aanneming tot kinders) tot die slotsom gekom het dat hulle nie die Christene uit die heidene onder die wet van Moses moet plaas (wat betref wette rondom wat is rein en wat is onrein in die konteks van aanneming) nie, maar het hulle eerder gewaarsku teen dinge soos die eet van bloed en wat verwurg is, en die eet van afgodsoffers... - dinge wat nie regtig gaan oor die onderwerp van "eet van voedsel" nie, maar meer gaan oor die 
besoedeling v/d gewete en 
besoedeling deur sonde (want in Hand. 15:29 word hulle ook gewaarsku teen sonde soos hoerery).  Inteendeel, die rede waarom daar nie van die Christen mans uit die heidene verwag word om hulle vleeslik te laat besny nie, is omdat dit hulle juis sou plaas onder die HELE wet van Moses! (Gal. 5:2,3).  

Ook volgens Rom. 14:20 is alle voedsel REIN om te eet!  Dit beteken nie dat daar nie meer iets bestaan soos rein en onrein diere nie, maar gaan oor die feit dat dit wat ingaan in die maag, jou nie onrein maak nie (Matt. 15:17);  inteendeel,  alles wat deur God geskape is, is goed, en niks is verwerplik as dit met danksegging ontvang word nie! (1 Tim. 4:4 - en l.w. dat hierdie gese is in konteks met dinge wat verkeerdelik verbied was deur sommige leermeesters, soos o.a. "sekere voedsels"). (1Kor. 6:13 - "Die voedsel is vir die maag, en die maag is vir die voedsel, maar God sal die een sowel as die ander tot niet maak. En die liggaam is nie vir hoerery nie, maar vir die Here; en die Here vir die liggaam").  (Rom 14:20 - "Moenie ter wille van voedsel die werk van God afbreek nie. Alles is wel rein, maar dit is verkeerd vir ‘n mens om te eet as dit tot aanstoot is") - Alle voedsel is wel rein vir die Christen (en l.w., spesifiek hier bedoel in konteks met VOEDSEL, nie met sonde nie!), maar weer-eens hier is die rede waarom ons verbied word om sekere kosse te eet, nie a.g.v. die feit dat sekere diere onrein is nie, maar dit gaan hier oor voedsel wat geeet word wat "tot aanstoot" is. 

Ons is dienaars van 'n nuwe testament, NIE VAN DIE LETTER NIE, maar van die gees.  In die Nuwe Testament word wette anders vervul as in die oue.  Jesus Christus het hierdie N.T. ingelyf deur Sy dood en opstanding (Hebr. 9; 12:24; Matt. 26:28; Mark. 14:24;  Luk. 22:20; 1 Kor. 11:25; 2 Kor. 3:6; ...). In hierdie "bedeling" is daar ook wette net soos in elke tydperk voor ons, maar hoe word die wette vervul in hierdie bedeling? Dit is ook belangrik om te sien dat mense in die O..T. ook nie altyd verstaan het "hoe" 'n wet vervul moet word nie, en Jesus het dit verskeie male uitgewys in Sy bediening en het juis kom leer "hoe verkeerd hulle sien" (vgl. gerus hierdie met die onderwerp van "besnydenis v/d hart")(Luk. 10:25-29; 18:18-24; Matt. 13:15; Mark. 8:18;...). Omdat die Christen die Gees van God het en "besny is na die hart", is dit vir hom moontlik om beter te verstaan "hoe" die Here se wette vervul word;  en saam met dit het Jesus Christus (en die apostels) vir ons die waarheid gebring oor wat Hy van ons verwag in hierdie Nuwe Testament tydperk.  

Ook in  Kol. 2:20-23 waar daar gepraat word met die "Christene uit die heidene", word (net soos in Hand. 15) hulle nie geleer oor watter diere geeet of nie geeet mag word nie, maar eerder die volgende geleer:   "Laat niemand julle dan oordeel in spys of in drank of met betrekking tot ‘n fees of nuwemaan of sabbat nie" - Kol. 2:16..  Alhoewel dit lyk of Kol. 2:20-23 eerder handel oor "wereldse wysheid", is ook die onderwerpe van besnydenis en feeste en sabbat aangehaal;  dus handel die konteks nie net oor wereldse wysheid nie, maar ook oor wette wat uit die wet van Moses kom...  Daarom moet hy wat eet, hom wat nie eet nie, nie verag nie; en moet hy wat nie eet  nie, moet hom wat eet, nie oordeel nie, want God het hom aangeneem (Rom. 14:3). Dit wat iemand eet kan hom nie onrein maak nie, tensy sy gewete hom aankla (Rom. 14:15,20).  Met die slotsom van Hand. 15:20 is die "Christene uit die heidene" geensins onder die wet van Moses geplaas (in die sin van wat hulle rein of onrein maak) nie, maar eerder wette gegee rakende "rein hou van sonde" en om toe te sien "dat hulle nie hulle gewetens besoedel nie".
_________________________________________________________________________________

Onderskei tussen wat is REIN en wat is ONREIN

Die woord REIN verwys na "skoon ( /gewas)".
Die woord ONREIN verwys na "besoedel".
Die woorde onrein en rein word nie altyd gebruik in die konteks van "sondig" of nie sondig nie, maar beskryf somtyds slegs 'n toestand, of andersins is dit gekoppel aan wette.  In die geval van "wette", moet ons ook onderskei tussen wat is wette van die Here (en Sy wette in die N.T.), en wat is mensgemaakte wette.
_________________________________________________________________________________
- (1)  WETTE wat deur die Here gegee word (oor wat is rein en wat is onrein) gaan beslis oor wat Hy as rein of as onrein verklaar. En kan terloops anders vervul word in verskillende tydperke oor "tyd" afhangende van wat die Here wil. Om dit beter te verduidelik, verwys sommige Christelike kerke hierna as "bedelings".  Nie dat die Here se wette ooit tot niet gaan nie!, maar dat dit anders vervul word in verskillende "tydperke", bv.: In die tydperk voor "Noag se ark", wil dit lyk of die mens nie toegelaat was om enige vleis te eet nie (Gen. 1:29), tog in die tydperk nadat die ark gestrand het was hulle toegelaat om vleis te eet (Gen. 9:3)... In elke tydperk is dit belangrik om te onderskei tussen wat is rein en wat nie (Lev. 10:10), en wat Hy rein gemaak het, mag ons nie onheilig ag nie (Hand. 11:9). Die vraag is nou egter oor watter wette rondom rein en onrein vir die Christen gegee is in die N.T.? In die geval van WETTE WAT DEUR DIE HERE GEGEE WORD wat nie gehoorsaam word nie,  asook die geval met SONDES (waarin iemand stap), word elkeen wat ongehoorsaam is aan hierdie wette, of homself verontreinig deur sonde, gesien as onrein.  (En in geval van wette wat deur die Here gegee word moet ons onthou dat ons "dienaars is van 'n Nuwe Testament"!).

- MENSGEMAAKTE WETTE is wereldse wysheid (Jak. 3:15,16; Kol. 2:8,20-23; 1 Kor. 3:18,19). Dit moet nie gesien word soos "wette van die Here" nie. - Waar die onderwerpe van rein/onrein gaan oor mensgemaakte wette, is dit NIE dinge waardeur die Christen homself kan VERONTREINIG NIE.  Bv., die Jode het geglo dat iemand onrein word wanneer hy met ongewaste hande eet, tog het Jesus iets anders geleer en gese dat om met ongewaste hande te eet, jou nie ONREIN maak nie (Matt. 15:20).  Hy het wette soos hierdie "gebooie van mense" genoem (Matt. 15:9). Paulus verwys ook na hierdie soort leringe as " 'n skyn van wysheid" wat in "eiesinnige godsdiens en nederigheid en in gestrengheid teen die liggaam, geen waarde het nie" (Kol. 2:20-23). Tog, sou iemand afdwaal v/d waarheid en sy hoop plaas in hierdie dooie werke (Hebr. 9:14), dan sal dit tot gevolg he dat sy GEWETE BESOEDEL (onrein) word! (Hebr. 9:14; Tit. 1:14,15).  

------------------------------------------------------------------------------------------------------------
- (2) In die geval van waar rein/onrein 'N TOESTAND BESKRYF:
Somtyds beskryf die woorde rein en onrein slegs 'n toestand, soos bv. in die O.T. was 'n vrou wat 'n kind baar vir 'n sekere tydperk "onrein".  Om "onrein" te wees kan ook verwys na iemand met 'n siekte (Mark. 1:40...), of verwys na iemand se maagdelike toestand (Openb. 14:4; 1 Kor. 7:28-32)....  Wanneer iemand BESOEDEL is met een of ander "gees" (Mark. 1:23...) beskryf dit ook 'n toestand.  In die geval van 'n man wat  trou, en homself dus "besoedel" met sy vrou (en dus maagdelik nie rein nie), word hy nie gesien as onrein omdat hy sondig nie!, maar die onreinheid hier beskryf slegs sy maagdelike toestand;   m.a.w. dit beskryf sy behae in sy vrou en die huwelik waarin hulle geheilig (afgesonder is) vir mekaar - hulle huwelik kan m.a.w. gesien word as REIN (maar hulle is maagdelik besoedel).  Maar as dit sonde is wat behaag word, soos in die geval van buite-egtelike gemeenskap of hoerery, dan beskryf die woord ONREIN nie slegs 'n toestand nie, maar die "gevolg van sonde".  Die persoon wat onrein is a.g.v. sonde, het REINIGING nodig, maar die persoon wat maagdelik nie rein is nie a.g.v. die feit dat hy in 'n heilige huwelik is, het nie reiniging nodig vir sy "onreinheid" nie...
------------------------------------------------------------------------------------------------------------
- (3) SONDE:
-  SONDE waardeur 'n mens onrein word kan nooit anders vervul word in verskillende tydperke nie - sonde bly altyd sonde.  Dit kan nie gister verkeerd wees en vandag reg wees nie (en kon nie gister jou onrein maak maar vandag nie dieselfde effek he nie!)  -  SONDE het altyd die gevolg dat iemand verontreinig word daardeur (Rom. 6:6).
_________________________________________________________________________________

GEDAGTE: 

"Rein" en "onrein" verwys nie net na dit wat rein of onrein verklaar is nie, maar ook na dit wat onrein "word" soos in die geval van waar iets of iemand VERONTREINIG word.  Bv., as iets onrein aangeraak of geeet is in die O.T. kon dit veroorsaak dat die persoon wat dit aanraak of eet, ook onrein word...(Lev. 5,7...).  Om dieselfde rede het die Joodse volk, as afgesonderde (heilige) volk vir die Here, geglo dat dit hulle nie geoorloof is om saam met heidene te eet en in hulle huise in te gaan nie (Hand. 10:28), want die heidene (en hulle huise) was ONREIN en dit sou veroorsaak dat hulle hulself verontreinig.  In die visioen aan Petrus het die Here egter aan hom verduidelik (Hand. 10) dat (in die N.T.) GEEN MENS onheilig of onrein genoem mag word nie;  - MAAR NIE in die sin van dat almal rein is van sonde en heilig is vir die Here nie!, maar spesifiek in die konteks van dat dit nie slegs een volk is wat geroep word nie, maar die Here roep mense uit enige nasie om vir Hom kinders te wees (dan Hy "heilig" hulle en maak hulle rein) - natuurlik spesifiek die wat Hom vrees en geregtigheid doen... (Hand. 10:35). Dit beteken dus dat, net soos in die geval van kos, alles vir die Christen rein is! m.a.w., hy kan homself nie verontreinig deur in die heiden se huis te kom of saam met hom te eet nie, want in daardie sin is die heiden "rein";  behalwe in die geval van waar daar in hulle afgodsoffers gedeel word, of die eet van bloed of dit wat verwurg is...-Hand. 15:20;  of waar daar gedeel word in hulle sonde! - 2 Kor. 6:17  -  in sulke gevalle sal die Christen definitief daardeur verontreinig word. 

_________________________________________________________________________________

http://warechristene.blogspot.co.nz/2016/10/rein-onrein-verontreinigingreinig.html
http://warechristene.blogspot.co.nz/2014/03/uit-genade-gered-3.html